قصيده أبكتني
يمـــه..
وين أبوي..؟!
قلتي بيجي بكرة...
وقلتي بيجي بكرة...!
متى بيجي بكرة ...؟!
أنا أعرف الصبح يصير هو
بكرة...!
وكل يوم يجينا الصبح
بس ما يجي بكرة ...!
الله يايمه..ياكرهي
لبكرة...!
صبري قضى يمه
ما عاد فيني حيل
*************
يمــه..من يوم ذاك الصوت القوي...
اللي يهز البيت أبوي ما شفته
صوت أيش يايمه...؟!
سمعت معه صراخ
وصوت إسعاف...
وحكي وبكاء...!
وأنتي تقولين إدخلي في
غرفتك ...
ودخلت في غرفتي...
وجلست بالحالي...إلين جاء
بكرة...
وأبوي ماشفته...
سهرانه طول الليل
*****************
يمـــه..
سمعت من سلمى تقول...
إن أبوها قال..نورة يتيمة..
طبعاً ضحكت وقلت...
ماني يتيمة...
أمي معي بالبيت..وأبوي..
يبي يجي بكرة...
بس القهر يمه من سالفة
بكرة...!
مدري متى بكرة...!
ياويلي يايمه...
ياويلي منه ويل..
**************
يمــــــه..
صديقتي حصة تقول...
أبوي أنا مقتول...!
طبعاً ضحكت وقلت...
من يقتل أبوي..؟!
قالت لي حصة...
ناس يقولون أنهم
أهل الجهاد.. والدين..
وهم مسلمين...
ياهي غبيه حيل...
ماتدري انه أبلى سعاد قالت
لنا مرة...
((ما يقتل المسلم أخوه))
وأبوي أنا مسلم...
والعام حجينا سوى ..وزرنا
الرسول...
يحليلها حصة...
ياهي غبية حيل...
***************
يمـــــة..من جد ودي أسألك...
أشوف بعيونك كلام...!
وأسمع من شفاهك كلام ...!
قولي لي يايمه..
أبوي فعلاً انقتل...؟!
إذا اليهود قتلوه...الله يايمه...
ياهو شرف...!
يحشر ورى حمزه..عم
الرسول
أبلى سعاد قالت لنا مرة...
((من مات مقتول وشهيد...
يبعث ورى حمز..
عم الرسول..))
ودمه يسيل.
****************
يمــــه..
بس الغريب..أختي عهود
سمعتها مرة تقول...
أبوي مقتول غدر...وهو يتوضاء
للفجر..!
أبوي ماجوه اليهود..؟!
وشلون يايمه...؟!
معقوله المسلم يقتل أخوه...؟!
أبوي انا مسلم .. يصلي ويصوم..
ودايم يسولف لي عن الجنه...
ويقول لي قصة محمد
معقوله يايمه..؟!
حلال يقتل المسلم أخوه..؟!
الله ...
ياكذبها أبلى سعاد...!
قالت لنا أنه حرام...!
بس أعتقد فعلاً حرام...!
وشلون يايمه ...؟!
وش صار بالدنيا...؟!
إلا على فكرة...!
وش معنى يايمه كلمة
عميل...؟!
وممكن يصير المسلم عميل...؟!
*******************
يمــــــــه..أحس بدمعة عيوني أقبلت
والعاده يمسحها أبوي...
هالمرة خليها تسيل ...
أدري بها دمعة يتيم...
وأدري بعد أني يتيمة....!
أبيها تحرق من غدر في روح
أبوي...
أبيها تكبر دمعتي....!
وتلعن الي حرمني من أبوي...
تكفين يايمه
خليها هالمرة تسيل.
للشاعر عبد الكريم المهنا